ನೆನಪಿನ ಪುಟಗಳಿಂದ - Final part

ನಮಸ್ಕಾರ

ಏನ್ ಸಮಾಚಾರ? ಎಲ್ರೂ ಆರಾಮ?

ಜ್ವರ ವಾಸಿಯಾಯ್ತು... ನಾನು ಮತ್ತೆ ಹೆಚ್ಚು-ಕಮ್ಮಿ ಆರಾಮಾಗಿದೀನಿ... 24ನೇ ತಾರೀಖು ಬೆಂಗ್ಳೂರಿಗೆ ಬಂದು ಸೇರ್ತಿದೀನಿ... ಇದ್ವರ್ಗು ನೇರವಾಗಿ ಬೆಂಗ್ಳೂರಿಗೆ ಬರೋಕೆ ಪ್ರಯಾಣದ ಚೀಟಿ ಸಿಕ್ಕಿಲ್ಲ... ಹೈದರಾಬಾದ್ ಮೂಲಕ ಬರ್ಬೇಕಾಗ್ಬಹುದು... ಪ್ರಯಾಣದ ವಿಭಾಗದವ್ರಿಗೆ ಬುಧ್ವಾರದ್ವರ್ಗು ನೇರವಾಗಿ ಹೋಗೋ ವಿಮಾನದ ಪ್ರಯಾಣದ ಚೀಟಿಗಾಗಿ ಪ್ರಯತ್ನ ಮಾಡಿ, ಇಲ್ಲ ಅಂದ್ರೆ ವಿಧಿ ಇಲ್ಲ, ಹೈದರಾಬಾದೋ, ಚೆನ್ನಯ್ಯೋ ನೋಡೋಣ ಅಂದಿದೀನಿ...

ಹೋದ್ಸರ್ತಿ ಪತ್ರದಲ್ಲಿ ಹೇಳ್ದಂತೆ ಈ ಪತ್ರದಲ್ಲಿ ನನ್ನ Frankfurt, Feldberg ಅನುಭವಗಳ ಜೊತೆ ನಿನ್ನೆ ಹಾಗು ಇವತ್ತು (ಇಲ್ಲಿ ಇನ್ನು ಭಾನುವಾರ ರಾತ್ರಿ) ನಾವು ಅನಿರೀಕ್ಷಿತವಾಗಿ ಮಾಡಿದ Prague ಪ್ರವಾಸದ ಬಗೆ ಕೂಡ ಹೇಳ್ತೀನಿ... ಪತ್ರ ಜಾಸ್ತಿ ಏನ್ ದೊಡ್ದಾಗಿರೊಲ್ಲ...

ಕಳೆದ ಶನಿವಾರ ನಾವು ಯಾವ್ದಾದ್ರೂ ಒಂದು ದೊಡ್ಡ ನಗರ ನೋಡೋಣ ಅಂತ Frankfurtಗೆ ಹೋಗಿದ್ವಿ... ಅಲ್ಲಿ ಒಂದು ಪಾಕಿಸ್ತಾನಿ ಉಪಹಾರ ಮಂದಿರದಲ್ಲಿ ಏನೋ ತಿಂದು Romer ಅನ್ನೋ ಜಾಗಕ್ಕೆ ಹೋರ್ಟ್ವಿ... Romer ಒಂದು ಚಿಕ್ಕ ಚೊಕ್ಕ ಜಾಗ... ಅದರ ಸುತ್ತ-ಮುತ್ತ ಕೆಲವು ಪ್ರೇಕ್ಷಣೀಯ ಸ್ಥಳಗಳಿದ್ರೂ ನಾವು ಅದನ್ನ ನೋಡೋಕೆ ಹೋಗ್ಲಿಲ್ಲ... ಯಾಕೆ ಅಂತ ನನ್ಗೂ ಗೊತ್ತಿಲ್ಲ... ಸುಮ್ನೆ ಪಕ್ದಲ್ಲೇ ಇದ್ದ ಒಂದು ನದಿ, ಹಾಗು ಅದರ ಸೇತುವೆ ನೋಡ್ಕೊಂಡು ಜನ ಸೇರೋ ನಗರದ ಮಧ್ಯ ಪ್ರದೇಶಕ್ಕೆ ಹೋದ್ವಿ... ಜನ ಇರೋ ಕಡೆ ಅಂಗ್ಡೀಗ್ಳು ಇದ್ವು... ನಾವು ಐದು ಜನ ಎರ್ಡ್ ಅಂಗ್ಡೀಗೆ ನುಗ್ಗಿದ್ವಿ...

ಭಾನ್ವಾರ Feldbergಗೆ ಹೋಗಿದ್ವಿ... ನಾವಿರೋ ಜಾಗದಿಂದ ಸುಮಾರು ನಾಲ್ಕು ಗಂಟೆ ಪ್ರಯಾಣ ಅಲ್ಲಿಗೆ... ಹೋಗಿ ಸೇರ್ದಾಗ್ಲೆ 3.30 ಆಗಿತ್ತು... Feldberg ಅನ್ನೋದು ಕರಿ ಕಾಡು (Black Forest) ಅನ್ನೋ ಪ್ರದೇಶದ ಹಿಮದಿಂದ ಕೂಡಿದ ಒಂದು ಜಾಗ... ನೋಡೋಕೆ ಚೆನ್ನಾಗಿದೆ... ನನ್ನ ಜೀವನದಲ್ಲಿ ಮೊದಲ್ನೇ ಬಾರಿ ಹಿಮವತ್ಪರ್ವತ ನೋಡಿದ್ದು... ಅಲ್ಲಿ 8-10 ವರ್ಷದ ಪುಟ್ಟ ಮಕ್ಕಳು ಹಿಮದಲ್ಲಿ ಜಾರ್ತಿದ್ರು (skiing) ... ನಮ್ಮಲ್ಲಾದ್ರ್ರೆ ಆ ವಯಸಿನ ಮಕ್ಳನ್ನ ರಸ್ತೆಗೆ ಬಿಡೋಕೆ ಹೆದರ್ಕೊತೀವಿ... ಅಲ್ಲಿ ಅವ್ರು ದೊಡ್ಡವರ ಮಧ್ಯೆ ಯಾರ ಸಹಾಯ ಇಲ್ದೆ ಎಷ್ಟ್ ಧೈರ್ಯವಾಗಿ ಆಟ ಆಡ್ತಿದ್ರು... ನಾವು ಆ ಪರ್ವತನ ಸೊಲ್ಪ ಏರೋ ಅಷ್ಟ್ ಹೊತ್ಗೆ ಆ ಥಂಡೀಗೆ ನಮ್ಮ ಪಾದಗಳು ಮರಗಟ್ಟಿರುವಂತೆ ಅನ್ನಿಸ್ತು... ಸರಿ ಇನ್ನ ಆಗೋಲ್ಲ ಅಂತ ಕೆಳ್ಗೆ ಇಳ್ದು, ಜಾಗ ಖಾಲಿ ಮಾಡಿದ್ವಿ...

ನಿನ್ನೆ ಇವತ್ತು Czech ದೇಶದ Prague ನಗರದ ಪ್ರವಾಸ ಮಾಡಿದ್ವಿ... ಮೊದ್ಲೇ ಹೇಳ್ದಂಗೆ ಇದು ಸೊಲ್ಪ ಅನಿರೀಕ್ಷಿತವಾದ ಪ್ರವಾಸ... Venice ನಗರದ ಪ್ರವಾಸ ಮಾಡ್ಬೇಕು ಅಂದ್ಕೊಂಡಿದ್ದ ನಮ್ಗೆ, ಅದು ಸಾಧ್ಯವಾಗ್ದೆ ಇದ್ದಾಗ ಇದು ಸಿಕ್ತು... ಗುರವಾರ ನಿರ್ಧಾರ ಮಾಡಿ, ಶುಕ್ರವಾರ ರಾತ್ರಿ ಪ್ರಯಾಣ ಬೆಳ್ಸಿದ್ವಿ... Prague (ಅಥ್ವಾ ಅಲ್ಲಿನವ್ರು ಅದನ್ನ ಕರೆಯುವಂತೆ Praha) ಭೂಗೋಳದಲ್ಲಿ ಒಂದು ನಗರವಾಗಿದ್ರೂ, ನಮಗೆಲ್ರಿಗೂ ಅನ್ಸಿದ್ದು ಅದು ಒಂದು ವಸ್ತುಸಂಗ್ರಹಾಲಯ ಅಂತ... ಪ್ರಪಂಚದ ಅತ್ಯಂತ ಸುಂದರ ನಗರಗಳಲ್ಲಿ ಒಂದಾಗಿರುವ Pragueನಲ್ಲಿರುವ ಪ್ರತ್ಯೊಂದು ಕಟ್ಟಡದ ಹಿಂದೆಯೂ ಬಹುಶಃ ಒಂದು ಕಥೆ ಇದೆ ಅನ್ಸುತ್ತೆ... ಛಾಯಾಚಿತ್ರ ತೆಗ್ಯೋಣ ಅಂದ್ರೆ ಯಾವ್ದನ್ನ ತೆಗ್ಯೋದು ಯಾವ್ದನ್ನ ಬಿಡೋದು ಅಂತ ಗೊತ್ತಾಗ್ಲಿಲ್ಲ... ಇಲ್ಲಿನ ಎಲ್ಲ ಪ್ರೇಕ್ಷಣೀಯ ಸ್ಥಳಗಳು ಒಂದೇ ಕಡೆ ಇರೋದ್ರಿಂದ ನಾವು ನಡ್ಕೊಂಡೇ ಸುತ್ಬೇಕು... ನಗರ ಕೂಡ ಅಂತಾ ದೊಡ್ದಾಗಿಲ್ಲ... ಪ್ರೇಕ್ಷಣೀಯ ಸ್ಥಳಗಳನ್ನ ನೋಡಿ ಮುಗ್ಸಿದ್ರೆ ಇಡೀ ನಗರ ನೋಡಿ ಮುಗ್ಸಿದಂತೆ... ಇಲ್ಲಿ ಪ್ರಪಂಚದ ಅತಿ ದೊಡ್ಡ ಕೋಟೆ (Castle) ಇದೆ... ಇಲ್ಲಿ ಈಗ ಈ ದೇಶದ ರಾಷ್ಟ್ರಪತಿಗಳು ವಾಸವಾಗಿದಾರೆ... ನಮ್ಮ ಮಾರ್ಗದರ್ಶಕಿ ಆ ಕೋಟೆಯ ಪ್ರಮುಖ ಸ್ಥಳಗಳನ್ನ ತೋರ್ಸಿ, ನನ್ತ್ರ ಕೋಟೆ ಕೆಳ್ಗೆ ಇಳ್ದು ಐತಿಹಾಸಿಕ Charles ಸೇತುವೆ ಮೇಲೆ ಕರ್ಕೊಂಡು ಹೋಗಿ, ಊಟಕ್ಕೆ ಇಲ್ಲಿನ ಸಾಂಪ್ರದಾಯಿಕ ಊಟ ಸಿಗುವ ಒಂದು ಉಪಹಾರ ಮಂದಿರಕ್ಕೆ ಕರ್ಕೊಂಡು ಹೋದ್ಲು... ಆದ್ರೆ ಅಲ್ಲಿ ಸಸ್ಯಹಾರಿಗಳಿಗೆ ಆಲೂಗಡ್ಡೆ ಹಾಗು ಈರುಳ್ಳಿ ತಿಳಿಸಾರು (soup) ಬಿಟ್ರೆ ಏನೂ ಇರ್ಲಿಲ್ಲ... ನಾನು ಅದನ್ನ ಕುಡಿದು, ಸೊಪ್ಪು-ಸದೆ ತಿಂದೆ.... ನಮ್ಮ ತಂಡದ ಇನ್ನಿಬ್ರು ಬಿಸಿ ದ್ರಾಕ್ಷಾರಸ (wine) ಕೂಡ ಕುಡಿದ್ರು... ಊಟ ಮುಗಿದ ಮೇಲೆ ನಮ್ಮ ಮಾರ್ಗದರ್ಶಕಿ ನಗರದ ವ್ಯಾಪಾರಿ ಮಳಿಗೆಗಳಿರುವ ಜಾಗಕ್ಕೆ ಕರೆತಂದು... ಅಲ್ಲಿಂದ ವಸತಿ ಗೃಹಕ್ಕೆ ಹೋಗುವ ದಾರಿ ತೋರ್ಸಿ ಹೊರ್ಟ್ ಹೋದ್ಲು.. ಆಮೇಲೆ ನಾವು ಬಿಲದಿಂದ ತಪ್ಪಿಸ್ಕೊಂಡ ಇಲಿಗಳಂತೆ ದಿಕ್ಕಿಗೊಬ್ರು ಹೊರ್ಟ್ವಿ.

ಇಲ್ಲಿ ಗಲ್ಲಿಗೊಂದು ವಸ್ತುಸಂಗ್ರಹಾಲಯ, ಎರ್ಡು ರಂಗಮಂದಿರ... ನಾವು ಕೂಡ ಒಂದು ಗೇಯರೂಪಕ (Opera) ನೋಡೋಣ ಅಂತ ಹೋದ್ವಿ... ಆದ್ರೆ ನಾವು ಆ ರಂಗಮಂದಿರ ಸೇರೋ ಅಷ್ಟ್ ಹೊತ್ಗೆ ಪ್ರವೇಶ ಚೀಟಿ ನೀಡುವ ಸಮಯ ಮುಗ್ದಿತ್ತು... ಅವತ್ತು Romeo Juliet ಪ್ರದರ್ಶನವಿತ್ತು... ನಾವು ನಮ್ಮ ಬಾಳಸಂಗಾತಿಗಳೊಡನೆ ಬರದಿದ್ದ ಕಾರಣ ಅದನ್ನು ನೋಡುವ ಭಾಗ್ಯ ನಮಗೆ ಸಿಗ್ಲಿಲ್ಲ ಅನ್ಸುತ್ತೆ...

ಇಲ್ಲಿ ಪ್ರದರ್ಶನ ಪೆಟ್ಟಿಗೆಯಲ್ಲಿ (showcase) ಇಡೋಕೆ ಒಳ್ಳೊಳ್ಳೆ ವಸ್ತುಗಳು ಸಿಗುತ್ತವೆ... ದರದ ಬಗ್ಗೆ ಹಾಗು ತೂಕದ ಬಗ್ಗೆ ಚಿಂತೆ ಇಲ್ದಿದ್ರೆ ಇಲ್ಲಿನ ಪ್ರಸಿದ್ಧ ಸ್ಫಟಿಕದ (crystal) ವಸ್ತುಗಳನ್ನ ಕೊಂಡ್ಕೊಬಹುದು... ನಂಗೆ ಇವೆರ್ಡ್ರ ಬಗ್ಗೆನೂ ಯೋಚ್ನೆ ಇದ್ದಿದ್ದ್ರಿಂದ ನಾನು ಅದನ್ನ ಬಿಟ್ಟು ಸುಮಾರು ಆಟದ ಸಾಮಾನುಗಳನ್ನ ತಗೊಂಡೆ... ಒಂದ್ ಅಂಗ್ಡೀಲಂತು ನಾನ್ ಏನ್ ತಗೋಳೋದು ಏನ್ ಬಿಡೋದು ಅಂತ ಗೊತ್ತಾಗ್ಲಿಲ್ಲ.. ಅಷ್ಟು ಥರಾವರಿ ಆಟದ ಸಾಮಾನುಗಳು... ಬೆಂಗ್ಳೂರ್ನಲ್ಲಿ ನಾನು ನೋಡ್ದೆ ಇರೋ ಅಂಥವನ್ನ ತಗೊಂಡು ಮಿಕ್ಕವನ್ನ ಬೇರೆಯವ್ರಿಗೆ ಬಿಟ್ಟು ಬಂದೆ. ನನ್ನ ಆತ್ಮೀಯ ಸ್ನೇಹಿತನೊಬ್ಬ ಒಂದು ಸಂಗೀತ ಸಾಧನ ತರೋಕೆ ಹೇಳಿದ್ದ... ಇಲ್ಲಿ ಒಂದೇ ಒಂದು ಅಂಗ್ಡೀಲಿ ಅದು ಸಿಗ್ತಿತ್ತು... ಆದ್ರೆ ಅದು ಶನ್ವಾರ-ಭಾನ್ವಾರ ಎರ್ಡ್ ದಿನಾನು ಬಾಗಿಲು ತೆಗ್ದಿರ್ಲಿಲ್ಲ... ಕ್ಷಮಿಸು ಗುರುವೇ... ಬೈಕೋ ಬೇಕು ಅನ್ಸಿದ್ರೆ ನೀನು ನಂಗೆ ಧಾರ್ವಾಡ್ ಪೇಡ ಕೊಡ್ದೇ ಇರೋದನ್ನ ಜ್ಞಾಪಿಸ್ಕೋ... ನಿಂಗೆ ಕೋಪ ನಂಗೆ ಬೈಗಳು ಎರಡು ಕಮ್ಮಿ ಆಗುತ್ತೆ... ;-)

ಒಟ್ಟಾರೆಯಾಗಿ ನಮ್ಮ ಈ ಪ್ರವಾಸ ಬಹಳ ಚೆನ್ನಾಗಿತ್ತು... ಇಲ್ಲಿಂದ ಹೋಗ್ತಾ ನಮ್ಮ ಜೊತೆ ಇದ್ದ ಮಲ್ಲು ತಂಡ ರಾತ್ರಿ ಎರ್ಡಾದ್ರು ಮಲ್ಗ್ದೇ ಹರ್ಟೆ ಹೊಡಿತೀದ್ರು ಅನ್ನೋದ್ ಬಿಟ್ರೆ ಮಿಕ್ಕಿದ್ದೆಲ್ಲ ಚೆನ್ನಾಗಿತ್ತು... ಒಳ್ಳೆ ವಸತಿ ಸೌಲಭ್ಯ, ಒಳ್ಳೆ ವಾಹನ ಚಾಲಕ, ಒಳ್ಳೆ ಮಾರ್ಗದರ್ಶಕಿ... ಒಳ್ಳೆ ಚಳಿ... ನಾವ್ ಮೂರೂ ಜನ ಮತ್ತೆ ನಮ್ಮ ಸಂಗಾತಿಗಳೊಡನೆ ಮತ್ತೆ ಇಲ್ಲಿಗೆ ಬರ್ಬೇಕು ಅನ್ನೋ ಮನಸ್ಸಿನೊಂದಿಗೆ ಈ ನಗರವೆಂಬ ವಸ್ತುಸಂಗ್ರಹಾಲಯಕ್ಕೆ ವಿದಾಯ ಹೇಳಿದ್ವಿ...

ಕೊನೇಲಿ ಎಂದಿನಂತೆ ಚಿಟಿಕೆ ಸುದ್ದಿ:

1.  ನಾವು Feldbergನಲ್ಲಿ Cheese Burgerನಲ್ಲಿ ದನದ ಮಾಂಸ (beef) ಇತ್ತು... ಇಲ್ಲಿನ ಜನರಿಗೆ ಅದು ಎಷ್ಟು ಸಾಮಾನ್ಯ ಅಂದ್ರೆ ಅವ್ರು ಅದನ್ನ ಉಲ್ಲೇಖಿಸೋದೂ ಇಲ್ಲ...

2.  Czech ದೇಶದ ರಾಷ್ಟ್ರೀಯ ಆಹಾರ ಹಂದಿ ಮಾಂಸ (pork)...

3.  Prague ಕೋಟೆಯ ಕಾವಲುಗಾರರು ಕಾರ್ಯನಿರತವಾಗಿರುವಾಗ ಸಾರ್ವಜನಿಕರು ಅವರನ್ನ ಮುಟ್ಟಬಾರದು... ಮುಟ್ಟಿದವರ ಮೇಲೆ ತಮ್ಮ ಆಯುಧ ಉಪಯೋಗಿಸುವ ಅಧಿಕಾರ ಅವ್ರಿಗೆ ಇದೆ...

4.  Bata ಸಂಸ್ಥೆ ಮೂಲತಃ Czech ದೇಶದ್ದು... ಇಲ್ಲಿ ಕೂಡ ಅವ್ರು ಮಾರುವ ವಸ್ತುಗಳ ಬೆಲೆ 399, 499,999,1099, ಈ ರೀತೀನೇ ಇದೆ.

5.  ಹೈದರಾಬಾದಿನಂತೆ ನಾನು ಇಲ್ಲಿ ಕೂಡ ನನ್ನ ಸಂಚಾರಿ ದೂರವಾಣಿ ಕಳ್ಕೊಂಡೆ.

ಇಲ್ಲಿಗೆ ಈ ಪತ್ರ ಮುಗೀತು... ನನ್ನ ಕೊನೆ ಐದು ದಿನಗಳ ಬಗ್ಗೆ ಏನಾದ್ರೂ ವಿಶೇಷ ಇದ್ರೆ ಅಲ್ಲಿಗೆ ಬಂದು ಹಂಚ್ಕೊತೇನಿ...

ಅಲ್ಲಿವರ್ಗೂ ಸಂಪರ್ಕದಲ್ಲಿರಿ... 

ಶ್ರೀಕಾಂತ್ 

ನೆನಪಿನ ಪುಟಗಳಿಂದ - Part 3

ಮಳೆನಂತೆ?

ಬಟಾ-ಬಟಾ ಬಿಸ್ಲಿನ ಮಧ್ಯೆ ಆಕಸ್ಮಿಕವಾಗಿ ಬಿದ್ದ ಮಳೆ ನಿಮಗೆಲ್ಲ ಖುಷಿ ಕೊಟ್ಟಿದೆ ಅಂದ್ಕೊಂಡಿದೀನಿ...

ನಾನು ಮುಂಚಿಂಥರಾನೆ ಹೆಚ್ಚು-ಕಮ್ಮಿ ಆರಾಮಗಿಲ್ಲ... ಬರಿ ಕಮ್ಮಿ ಆರಾಮಾಗಿದೀನಿ... ಯಾಕಂದ್ರೆ ನಂಗೆ ಈ ವಾರ ಪೂರ್ತಿ ಹುಷಾರಿಲ್ಲ... ಸ್ವಲ್ಪ ಜ್ವರ, ನೆಗ್ಡಿ... ಸುಧಾರ್ಸ್ಕೊಳೋಕೆ ಪುರ್ಸೊತ್ತಿಲ್ಲ.

ಈ ಸರ್ತಿ ಪತ್ರದಲ್ಲಿ ನಾನು ಬೇಕಾದ್ದಂಗೆ English words use ಮಾಡಿದೀನಿ... ಈಗ ನೇರವಾಗಿ ವಿಷ್ಯಕ್ಕೆ ಬರ್ತೀನಿ...

ನಾವು ಹೋದ್ವಾರ ನಮ್ಮ guesthouse ಹತ್ರ ಇರೋ Heidelberg ಮತ್ತು Mannheim ಅನ್ನೋ ಸ್ಥಳಗಳಿಗೆ ಹೋಗಿದ್ವಿ... ಈ ಜಾಗಗಳನ್ನ ಆಯ್ಕೆ ಮಾಡ್ಕೊಳೋಕೆ ಕೆಲವು ಕಾರಣಗಳಿದ್ವು...
೧.  ನಮಗೆ ಬೇರೆ ದೇಶ ನೋಡೋಕೆ ಉತ್ತಮ ದರದಲ್ಲಿ ಯಾವದೇ option ಸಿಗ್ಲಿಲ್ಲ...
೨.  ನಾವು ಇಲ್ಲಿ ಇನ್ನು ಏನೂ shopping ಮಾಡಿರ್ಲಿಲ್ಲ
೩.  Heidelbergನಲ್ಲಿ ಭಾರತೀಯ ಉಪಹಾರಮಂದಿರಗಳು ಬಹಳಷ್ಟಿವೆ ಅಂತ ಕೇಳಿದ್ವಿ...

Heidelberg: Heidelberg ಒಂದು ಪುಟ್ಟ ನಗರ. ಸುತ್ತಲೂ ಹಸಿರು ಬೆಟ್ಟ, ಒಂದು ಕಡೆ Neckar ನದಿ ಹೊಂದಿರುವ ಈ ಸ್ಥಳ ತುಂಬ ಚೆನ್ನಾಗಿದೆ ... ಅಲ್ಲಿ ಹೋಗ್ತಿದ್ದಂಗೆ ನಮ್ಗೆ ನಮ್ಮ ಜೊತೇಲೇ ಕೆಲ್ಸ ಮಾಡೋ ಇನ್ನೊಂದು Wipro ತಂಡ ಸಿಕ್ತು, ಅವ್ರೆಲ್ಲಾ ಕೆಲವು electronic items ತಗೊಳೋಕೆ ಹೊರ್ಟಿದ್ರು, ನಾವು ಅವ್ರ ಜೊತೇಲಿ ಹೋದ್ವಿ, ಆದ್ರೆ ನಮ್ಗೆ ಎಲ್ಲದರ ಬೆಲೆ ಜಾಸ್ತಿ ಅನ್ನಿಸ್ತು, ಏನೂ ತಗೊಳ್ದೇ ಜಾಗ ಖಾಲಿ ಮಾಡೋವಾಗ ಅವ್ರು ನಮಗೆ ಇಲ್ಲಿ ರಾಜ ರಾಣಿ ಅನ್ನೋ ಭಾರತೀಯ ಉಪಹಾರಮಂದಿರದಲ್ಲಿ ಊಟ ತುಂಬಾ ಚೆನ್ನಾಗಿರುತ್ತೆ ಅಂದ್ರು... ಸರಿ ನೋಡೋಣ ಅಂತ ಅಲ್ಲಿ ಹೋದ್ರೆ ನಮ್ಗೆ ಸಿಕ್ಕಿದ್ದು German ಶೈಲಿಯಲ್ಲಿ ಮಾಡಿದ ಭಾರತೀಯ ತಿಂಡಿ.. ಅಂದ್ರೆ, ಸಪ್ಪೆ ಪಾಲಾಕ್ ಪನೀರ್ (ಅದು ಚೆನ್ನಾಗಿ ಮಸಾಲೆ ಇರ್ಬೇಕು, ಖಾರ್-ಖಾರ್ವಾಗಿರ್ಬೇಕು ಅಂತ ಹೇಳಿದ್ಮೇಲೆ ಈ ಗತಿ, ಹೇಳಿರ್ಲಿಲ್ಲ ಅಂದ್ರೆ ಇನ್ನೇನ್ ಆಗ್ತಿತ್ತೋ?!!!). Fridge ಇಂದ ತೆಗೆದು ಬಿಸಿ ಮಾಡಿದ fish curry... ಎಲ್ಲಕ್ಕಿಂತಾ ಮುಖ್ಯವಾಗಿ  ಬೆಣ್ಣೆ, cheese ಬೆರೆಸಿದ tomato soup... ನಿಜವಾಗಲೂ ಇದನ್ನಾ ನಮ್ಮವ್ರೆಲ್ಲ ಅಷ್ಟು  ಹೊಗ್ಳಿದ್ದು ಅಂತಾ ಆಶ್ಚರ್ಯವಾಯ್ತು...

ನಂತರ ನಾವು ಅಲ್ಲಿನ ಪ್ರಸಿದ್ಧವಾದ castle ನೋಡೋಕೆ ಹೊರ್ಟ್ವಿ.. ಅದು ಒಂದು ಒಳ್ಳೆ ಜಾಗ. ಯಾವ್ದೋ ಯುದ್ಧದಲ್ಲಿ ಹಾಳಾಗಿ ಈಗ ಜೀರ್ಣೋದ್ಧಾರದ ಕೆಲ್ಸ ನಡೀತಿತ್ತು.. ಅಲ್ಲಿಂದ Neckar ನದಿ, ಹಾಗು ಅದರ ತೀರದಲ್ಲಿರುವ Heidelberg ನಗರದ ದೃಶ್ಯ ಮನೋಹರವಾಗಿತ್ತು... ಒಂದೆರ್ಡು photos ತೆಗ್ಯೋಷ್ಟ್ರಲ್ಲಿ ನನ್ನ camera battery ಸತ್ತೊಯ್ತು.. ಆಮೇಲೆ ಆ castle ಒಳಗೆ ನೋಡ್ಕೊಂಡು, ಜಾಗ ಖಾಲಿ ಮಾಡಿದ್ವಿ...busನಲ್ಲಿ ನಮಗೆ ಅಲ್ಲೇ ಬಹಳ ವರ್ಷಗ್ಳಿಂದ ಅಲ್ಲೇ ವಾಸವಾಗಿರೋ ಒಬ್ರು ಭಾರತೀಯರು ಸಿಕ್ಕಿ shopping ಆದ್ರೆ ನೀವು Mannheimಗೆ ಹೋಗಿ, Heidelbergನಲ್ಲಿ ಎಲ್ಲಾ ಬೆಲೆ ಜಾಸ್ತಿ ಅಂದ್ರು...

ನಾವು ಸರಿ ಅಂತ main tram/bus standಗೆ  ಬಂದು, Mannheimಗೆ ಹೊರ್ಟ್ವಿ...

Mannheim: Mannheim Heidelbergಗಿಂತ ದೊಡ್ಡ ನಗರ.. ಅಲ್ಲಿ ಅವತ್ತು ಪ್ರತ್ಯೊಂದು ಅಂಗ್ಡೀಲೂ discount sale ಹಾಕಿದ್ರು... ಮೊದ್ಲು ನಾವೆಲ್ರೂ ಒಂದೇ ಅಂಗ್ಡೀಗೆ ನುಗ್ಗಿದ್ವಿ... ನಾನೂ ರಾಜೇಶ್ ಅಲ್ಲೇ ಉಳ್ಕೊಂಡ್ವಿ, ಮಿಕ್ಕ ಇಬ್ರು ಬೇರೆ  ಅಂಗ್ಡೀಗಳನ್ನ ನೋಡೋಕೆ ಹೊರ್ಟ್ರು...ನನ್ನ shopping ಒಂದೇ ಅಂಗ್ಡೀಲಿ ಮುಗೀತು... ಒಂದೇಳು jerkins, ಮೂರು handbags, ತಗೋಳೋಷ್ಟ್ರಲ್ಲಿ ನಂಗೆ ನನ್ನ luggage, flightನಲ್ಲಿ allow ಮಾಡೋ maximum weightಗಿಂತ ಜಾಸ್ತಿ ಆಗಿದೆ ಅಂತ ಗೊತ್ತಾಯ್ತು.. ಅಲ್ಲಿಗೆ ನಿಲ್ಸಿದೆ...

ನಾವು ಅಲ್ಲಿಂದ ಬಂದು, ಇನ್ನೊಂದ್ ಎರ್ಡ್ ಅಂಗಡಿ round ಹಾಕೊಂಡ್ ಬರೋಷ್ಟ್ರಲ್ಲಿ ಮಿಕ್ಕ ಇಬ್ರು ಬಂದಿದ್ರು.. ಅವ್ರೂ ಸುಮಾರಾಗೇ shopping ಮಾಡಿದ್ರು... ಎಲ್ಲಾ ಏನ್ ತಗೊಂಡೆ, ಎಷ್ಟಾಯ್ತು ಅಂತ ಕೇಳಿ ಮುಗ್ಸೋ ಅಷ್ಟೊತ್ಗೆ ನಮ್ಮ tram ಬಂತು... ಹೊರ್ಟ್ವಿ ಮತ್ತೆ Heidelberg ಕಡೆಗೆ...

Heidelbergಗೆ ಬಂದು ನಾವು ತಿನ್ನೋಕೆ ಏನಾದ್ರೂ ಶಾಕಾಹಾರಿ ತಿನಿಸು ಸಿಗುತ್ತಾ ಅಂತ ನೋಡಿದ್ವಿ, ಆದ್ರೆ ಪ್ರಯೋಜ್ನ  ಆಗ್ಲಿಲ್ಲ... ಮನೇಲೇ ಮಾಡಿದ್ರೆ ಆಯ್ತು ಅಂದ್ಕೊಂಡ್ ಮನೆ ಕಡೆ ಹೋಗೋಕೆ tram/bus standಗೆ ಬಂದ್ರೆ ಅಲ್ಲಿ bus ಇಲ್ಲ... ಸರಿ train stationಗೆ ಅಂತ ಒಂದು tram ಹತ್ತಿದ್ವಿ... ಅಲ್ಲಿ ನಮ್ಗೆ ಇನ್ನೊಂದು ಭಾರತೀಯ ತಂಡ ಸಿಕ್ತು... ಅವ್ರೂ ಕೂಡ ರಾಜ ರಾಣಿ ಊಟ ಮಾಡೋಕೆ ಬಂದಿದ್ವಿ ಅಂದಾಗ ನಾವ್ ನಾಕೂ ಜನ ಜೋರಾಗಿ ನಕ್ಬಿಟ್ವಿ... ಅವರೆಲ್ಲ ಯಾಕೆ-ಯಾಕೆ- ಅಂತ ಮುಕ್-ಮುಖ ನೋಡ್ಕೋತಿದ್ರು...

ಅಲ್ಲಿಂದ guesthouseಗೆ ಬಂದು ಸಾಮಾನ್ ಇಟ್ಟು ಹತ್ರ ಇರೋ pizza ಅಂಗ್ಡೀಗೆ ಹೋಗಿ pizza ತಿಂದ್ವಿ...

ಇದು ಶನಿವಾರದ ಕಥೆ...

ಭಾನ್ವಾರ Black Forestಗೆ ಅಂತ ಹೊರ್ಟು train miss ಆಗಿ, ಮತ್ತೆ Heidelbergಗೆ ಹೋಗಿ ಬಂದ್ವಿ ಅಷ್ಟೇ...

ಈಗ ಕೊನೇಲಿ ಚಿಟಿಕೆ ಸುದ್ದಿ:
1.  ನಮ್ಮ guesthouse ಹತ್ರ ಇರೋ pizza ಅಂಗ್ಡೀಲಿ pizza ತಯಾರು ಮಾಡೋವ್ರು 3 years experience ಇರೋ mechanical engineer. Iraq ದೇಶದಿಂದ ಬಂದಿರೋ ಈತನಿಗೆ German grammar ಬರೋಲ್ಲ ಅನ್ನೋ ಒಂದೇ ಕಾರಣದಿಂದ ಅವ್ನಿಗೆ ಇಲ್ಲಿ ತನ್ನ ಓದಿಗೆ ತಕ್ಕ ಕೆಲ್ಸ ಸಿಕ್ಕಿಲ್ಲ... ಈಗ grammar classes attend ಮಾಡ್ತಿದಾನೆ, ಆದಷ್ಟು ಬೇಗ ಈ ಕೆಲ್ಸ ಬಿಟ್ಟು ಮತ್ತೆ engineer ಆಗ್ತೀನಿ ಅಂತ ನಂಬಿಕೆ ಇಟ್ಕೊಂಡಿದಾನೆ...
2.  ಭಾನ್ವಾರ ಇಲ್ಲಿ ಒಂದು ಅಂಗ್ಡೀನೂ ತೆಗ್ಯೋಲ್ಲ... ರಸ್ತೇಲಿ ಜನ ಕೂಡ ಕಮ್ಮಿ... ಒಳ್ಳೆ curfew ಹಾಕ್ದಂಗೆ ಇರುತ್ತೆ... ಎಂತೆಂಥಾ ದೊಡ್-ದೊಡ್ಡ shopping malls ಕೂಡ ಭಾನ್ವಾರ ರಜ... ಆಗ ನಂಗೆ ನಮ್ ಬೆಂಗ್ಳೂರ್ ನೆನ್ಪಾಯ್ತು... ಅಲ್ಲಿ ಹೀಗಾದ್ರೆ ಹೇಗೆ...

ಇಲ್ಲಿಗೆ ಈ  ಮುಗೀತು... ನಾವು ನಿನ್ನೆ Frankfurt, ಹಾಗು ಇವತ್ತು Feldbergಗೆ ಹೊಗಿದ್ವಿ... ಅದ್ರ ಬಗ್ಗೆ ಮುಂದಿನ್ ಪತ್ರದಲ್ಲಿ  ಬರೀತೀನಿ...

ಅಲ್ಲಿವರ್ಗೂ ಸಂಪರ್ಕದಲ್ಲಿರಿ....

Sreekanth